100 аз жаргалтай өдөр - 7

Хайрлая!!! Зүгээр л хайрлая! Май чи! Май л даа! Ингээд хайрлуул гээд хайрлаад өгье. Юу хайрлах вэ гэж үү? Юу ч байсан яадаг юм! Одоо шууд гараад өчигдөр шөнө гадаа хоносон, өнөөдөр дугаар нь явдаггүй машин дээр тогтсон байгаа цасан дээр `Хайртай шүү` гээд хуруугаараа биччихье. Гэхдээ чин сэтгэлээсээ шүү. Эсвэл зам дээр очоод явган хүний гэрлийг шууд тэвэрж аваад хайрлая. Тэр чинь хүнтэй машинтай нь зэрэг явуулаад хайр хүргээд байдаг юм. Сарыг хайрлая, тэгээд шөнө болгон ширтээд гуниглаж сууя. Нарыг бас хайрлая, өдөр нүдээ онийлгож байгаад ширтэж байя, үнсэлт илгээе, давхар Д витаминаа нөхөж авья. Шууд компьютерээ хайрлая, тоос моосыг нь арчия, өнөөдөр эрт унтрааж баярлуулъя. Бүсгүйчүүд нь харвингаа, эрчүүд нь гүзээгээ голж шилэхгүй хайрлая.
Эсвэл эмээ өвөөгөө хайрлая, эртхэн босоод утсаар ярьж амар мэндийг нь асууя, ээж аавыгаа хайрлая, сайн хүн болъё. Өчигдрийн автобусны кондуктарыг хайрлая л даа, мөнгө өгж яваад байхад чинь муухай хараад байна лээ шд, стресстэй байсан байх хөөрхий минь. Өөр хэнийг хайрлах уу? Нөгөө муу нэртэй, луу данстай 76-г хайрлая, бид нартай л адилхан эх орноо хөгжүүлэх сэтгэлтэй, бид нартай л адилхан хувиа хичээх сэтгэлтэй, бас бид нартай л адилхан төөрчихсөн явж байгаа шд. Мах идэж амьтны амь хөнөөдөггүй цагаан хоолтнуудыг, мах идэж өвснүүдийг авардаг махан идэштэнгүүдийг адилхан, ялгахгүй сайхан хайрлая. Баян хүмүүсийг нь сайхан хайрлая, ядуу хүмүүсийг нь яг адилхан сайхан хайрлая. Царайлаг, царай муутай аль алинийг нь сэтгэлээсээ хайрлая. Архичнийг хайрлая, харин архийг нь хайрлахгүй орхичихъё.