Нүдэн баримжаагаар - UB JAZZ CLUB

Гэнэт өөрийн орох дуртай энэ газрын тухай бичмээр санагдчихлаа. Би мэргэжлийн хоол шүүмжлэгч, ресторан шүүмжлэгч биш болохоор өөрийнхөө л туршлагыг бичье. Жааз Клаб маань Хүүхдийн 100 буюу Сөүлийн гудамжинд байрладаг. Би яг тэнд гээд хэлчихэж чадахгүй байна гэхдээ Сөүлийн гудамжаар өлийгөөд явж байхад олдож л таараа.

Зундаа гадаа суух талбайгаа үнэхээр дажгүй зассан байсан. Ширээ тус бүр нь жижигхэн саравчинд, дээрээ гэрэлтэй, тэрүүхэн тэндээ тусгаарлагдчихсан. Харин дотроо бол намхан, жижигхэн ширээнүүдтэй, бас ихэвчлэн гадныхан суудаг өндөр тек маягийн ганц урт ширээтэй, улаан хүрэн ханатай. Тохилог санагддаг шүү.

За хоол нь гэвэл Армянь үндэсний хоолоор үйлчилдэг, би л лав 2 төрлийн хоол, Цезарь салат, шарсан төмсийг нь идэж байсан. Би Армянь хоол ойлгохгүй юм байна лээ. Гэхдээ муухай  биш байсан. Нээрээ, бодоод байсан чинь би хаана ч орж, юу ч идэж, ууж байсан дандаа шарсан төмс авдаг юм байна ш дээ. Эдний шарсан төмс порц ихтэй, бас ч үгүй салса малсатай ирнэ ээ. 

Уух юмны хувьд гэвэл хаа сайгүй байдаг ихэнх уух юм байдаг. Хамгийн таалагдсан нь захиалсан уух юмаа өөрийн хүссэнээр жаахан өөрчлүүлэхэд татгалзах юмгүй зөвшөөрөөд, гоё хийгээд ирдэг нь. Би бол кофендоо жаахан крем нэмүүлэх гэх мэтчилэн жижиг сажиг юм орох болгондоо хүсдэг юм.

Үйлчилгээ бол нэг эрэгтэй зөөгч байдаг юм аа. Олон жил ажиллаж байгаа байх гэж би боддог. Яагаад гэвэл менюн дээрээ тэрний зураг нь байдаг юм. За тэр ч яах вэ, тэр залуу ёстой мундаг, үнэхээр эелдэг, хурдан бас алдаа нэг их гаргадаггүй, гэхдээ хэтэрхий серёзны ч биш. Тэр бараг Жааз Клабын захирлын хүү байх аа. Харин зун хэдэн эмэгтэй зөөгчид байсан нь хүн дуудаад байхад сонсдоггүй, сонсохоороо ирдэггүй, ирэхээрээ захиалга авдаггүй, авахаараа авчирж өгдөггүй, авчирж өгөхөөрөө хурааж авахаа мэддэггүй тийм хүмүүс байсан л даа.

Жааз Клабын тайзан дээр нэг их секси улаан микрофон байдаг юм. Орох болгонд тэрэнд нүд унагаана. Хүн хэрэглэж байсныг хараагүй болохоор сувинер ч байж магадгүй. Тэгэхдээ нэг өдөр би тэрийг өөрийн болгоноо, муахахахаха

Цистит - яаж нэгийгээ үзэлцэх вэ?

Сайн байцгаана уу?
Та бүхэнд энэ цастай, шавартай, салхитай, үүлтэй, нартай, намар ч юм шиг, өвөл ч юм шиг өдрийн мэндийг хүргэе! Ажил амьдрал хэр байна даа?
Би яах вэ, дажгүй шүү. Дажгүй ч гэж дээ, ажиллаж амьдрах гээд зүтгэж явтал зам дээр цистит гэж нэг юм гарч ирээд гай болоод байх юм. Цистит болж үзээгүй хүн ямар хэцүү байдгийг нь ойлгохгүй байх. Ямар ч байсан хөнгөнөөр бие засмаар байнга санагдаад, ариун цэврийн өрөө орохоор зүгээр л өвдөөд байдаг нэг тийм өвчин юм.
Тэгээд хүйтний улиралд охид, бүсгүйчүүдэд их тохиолддог болохоор интернетээр олж мэдсэн жаахан мэдлэгээ хуваалцая гэж бодлоо.
Тэгэхээр бид цистит даарснаас үүдэлтэй гэж боддог, би ч бас 30 минутын өмнөх хүртэл яг тэгж бодож, хэзээ, хаана, яаж даарснаа санах гээд сууж байлаа. Гэтэл цистит бол даарснаас болж биш харин бидний биед байдаг E. Coli гэдэг бактери шээсний сүвээр дамжин, давсганд орж үржсэнээр эхэлдэг өвчин юм байна. Бохир бассеинд сэлэх, хэт хурц үнэртэй саван хэрэглэх, дархлаа муудах зэрэг харин энэ бактерийг үржихэд үнэтэй хувь нэмрээ оруулдаг бололтой.
За, тэгвэл яаж гялс циститээс салах вэ? Нэгэнт энэ өвчин маань бактерийн гаралтай үрэвсэл учраас антибиотикт дарагддаг байх нь. Ихэвчлэн эмэгтэй хүмүүс 3 хоног, эрэгтэй хүмүүс 7-14 хоног антибиотикийн эмчилгээ хийлгэх шаардлагатай.
Харин антибиотик үйлчилж эхэлтэл халуун жин тавих, халуун усанд суух, цэвэр ус ихээр уух, цангис жимс идэх нь өвчнийг намдаах нь. Би ажилтай байгаа учраас өвчин намдаах эм уугаад, усыг аяга аягаар нь залгилж, Хасажи-гийн хатаасан цангис жимсийг мэрээд сууж байна даа. Бас антибиотик авсан.
Циститийг хэрвээ эмчлэхгүй орхивол 4-9 хоногийн дотор өөрөө эдгэрдэг ч E. Coli бактери бөөр лүү орж үрэвсүүлэх аюултай байдаг юм байна. Харин бөөрний өвчин бол энэ циститний хажууд хэдэн арав дахин муухай учраас эртхэн дээр нь эмчлэх хэрэгтэй гэж байна шүү нөхдүүдээ!
mayoclinic.org хуудаснаас мэдээллийг авав.

Cocktails - Дарсанд мэргэн ухаан, шар айрагт эрх чөлөө, усанд бактери бий

Дээрхи мэргэн үгийг Бенжамин Франклин хэлсэн юм. Би ус хангалттай ууж, хааяа дарс шимдэг ч шар айрганд үнэхээр дургүй. Харин коктейль үнэхээр сонирхолтой шүү. Тэр тусмаа өмнө нь ууж үзээгүй коктейль шинээр туршихад нэг бол тэр коктейль чиний шинэ дуртай коктейль болж эсвэл чи мөнгөө дэмий юманд үрсэн байх болно.
Дэлхийн хамгийн түгээмэл коктейлуудыг Гүүгл ахаас асууж, гарч ирсэн хариун дундаас өөрийн мэдэхийг түүвэрлэлээ.
1-р байранд Mojito, Cosmopolitan 2 ихэнхдээ өрсөлддөг бололтой. Mojito (Мохито) бол Куба ром дарс, нимбэгийн шүүс, спрайт ундаа, бор сахар болон хамгийн чухал орц болох гааны навчнаас бүтсэн сэнгэнэсэн амттай коктейль билээ. Зуны халуун орой хүмүүсийн уудаг хүйтэн шар айрагнаас ч сайхан мэдрэмж өгнө.Харахад л сэрүү оргиулаад л...

Mojito-гийн өрсөлдөгч бол Cosmopolitan. Ягаан өнгөтэй, Мартинигийн хундганд байх, секси ч гэж хэлж болох Cosmopolitan сүүлийн 20-30 жилийн хамгийн алдартай коктеилиэр шалгарсан. Секс ба Их Хот (Sex and the City) цувралыг үзсэн бол яах аргагүй энэ ундааг мэдэж, уухыг хүссэн байх нь тодорхой. Космогийн гол найрлага нь цангисийн жүүс, архи, жүржийн ликёр, нимбэгийн шүүс зэрэг ч газар нутаг тэр байтугай бартендер бүрийн орц өөр байдаг. Хэрэв өөрийгөө ер бусын үзэсгэлэнтэйгээр мэдэрч байвал, өнөө орой заавал Космо уугаарай.

Маргарита коктеиль ч дээгүүр байранд оржээ. Яах ч аргагүй хамгийн классик коктеилүүдийн нэг болох Маргарита нэг дор давсархаг, чихэрлэг бас хурц амтыг агуулдаг. Тэгэхээр энэ коктеиль маань нэг төрлийн адал явдал болж таарч байна. Орц нь ч бас энгийн, текила, жүржийн ликёр, нимбэгийн шүүс зэрэг юм. Гол нь хундагын ирмэгээр давс цацаж өгдөг. Текила, давс хоёрыг яахин салгаж болох билээ дээ. Хамгийн түгээмэл, хамгийн алдартай коктеилүүдийн нэг учраас мөн л орц найрлага нь тэр чинээгээрээ өөр байж болно.

Дараагийн коктеиль бол Long Island Iced Tea. Та хэрвээ өнөө орой сайхан согтоё гэж бодож байгаа бол энэ коктеиль яг таарна. Маш олон төрлийн архийг хольдог бөгөөд өндөр стаканд хундагалдаг. Цагаан архи, текила, бакарди, жин архи, куантро зэргийг жүржийн шүүс, колатай холин олгоно. Бараг сургаар нь л согтмоор энэ коктеилийг уухаар шийдвэл араа ч бас бодоорой.

Мэдээж хамгийн түгээмэл коктеилийг шалгаруулахад хүн бүхний санал зөрөх ч би 5 дахь түгээмэл коктеилиэр энэ жагсаалтын 2 дахь хатуу коктеиль болох White Russian буюу Цагаан Оросыг шалгаруулж байна. Нилээд алкохолний найрлагатай энэ коктеильний бараг 3-ны 2 нь цагаан архи үлдсэн хэсэг нь кофе суурьтай ликёр мөн өтгөрүүлсэн сүү байдаг. Цагаан Оросын нэг сонирхолтой зүйл нь хэсэг хугацаанд `од` болж, хэсэг хугацаанд оргүй алга болдогт байдаг юм байна. Одоо `од` болж байгаа үе нь гэдэгт итгэлтэй байгаа шүү. Би Цагаан Оросыг бага зэрэг кремтэй холих дуртай, архины гашуун амт нь алга болдог юм.

Гэхдээ ихэнх коктеилүүд маш их чихрийн агууламжтай байдаг болохоор архитай нийлээд жин нэмэхэд хүргэдэг гэдгийг санаарай.
Архиа бага ууж, кофегоо их ууцгаая!

Харри Поттер ба Миний Амьдрал

Би анх 9-р ангидаа номын дэлгүүрт Харри Поттер ба Азкабаны Хоригдол номыг зарж байхдаа таарч байлаа. Шууд хараад л, зүрх хурдан цохилоод л... Хатуу хавтастай, гоё цаастай, гоё ч фондоор бичигдсэн, нэг хуудсан дээрх үг үсгийн тоо таарчихсан, гүй ээ мөн сайхан амьтан байсансан. Гялс гэр лүүгээ гүйж очоод ааваас гуйн байж 10000 төгрөг аваад нөгөө номоо худалдаж авсан.
Анх удаагаа л англи хэл дээр ном уншиж байгаа нь тэр байв. Өмнө нь зурагтай, зургийг нь хараад л ойлгож болох тийм ном л ганц, хоёрыг уншсан туршлагатай байлаа. Харри Поттерийнхоо эхний хэдэн хуудсыг уншаад бараг юу ч ойлгосонгүй, аргаа бараад мэдэхгүй үгнүүдээ тольноос хараад унших гэж оролдсон. Даанч тэгэхээр хэт их цаг алдаад, би ч өөрөө залхаад байсан юм.
Тэгээд шууд л уншиж эхэлсэн, ойлгосон ч, ойлгоогүй ч уншаад л байв. Киног нь нилээд хэд үзэж байсан болохоор `аан тэр хэсэг дээр нь л яваад байна даа` гээд таамгаараа л баахан англи үгнүүд өдөржингөө харж суудаг байлаа. 1 уншлаа, дараагийн ном нь олдоогүй учраас 2 дахиа уншлаа, 3 дахиа уншлаа. Гэнэт нэг өдөр номоо ойлгоод эхэлсэн! `Аан ингэж байгаа юм байна шдээ!`
Дахиад 1-2 уншихад бүр ч сайн ойлгодог болж, үгийн баялаг нэмэгдэж, гол нь үгийг өгүүлбэрээр нь, параграфаар нь ойлгодог болов. Ингээд дээд ангийн эгчээсээ бусад 6 номыг нь э-ном хэлбэрээр авж уншлаа. Өдөр шөнөгүи компьютерийн урд ангайгаад л суучихна. Хоолоо идэхээ ч мартчихна. Уншиж дуусаад ийм номыг яаж ингэж сэтгэж бичдэг байна аа гэж гайхч, биширдэг байлаа.
Дараа нь 11-р ангид Англи Хэлний олимпиадад бэлдэж байхдаа ч Харри Поттерийн 7 номыг уншиж, мөнгөн медаль авсан. Би өөрийгөө лаг Англи хэл мэддэг, ёстой мундаг энтр гэх гээгүй шүү! Харин ч тийм биш, гэхдээ би iBT Toefl шалгалтны унших хэсэг дээр 30 буюу бүтэн оноогоо авсан юм.
Даанч анх авсан жилдээ анги дээрээсээ тэр номоо алдчихсан. Аймар гутарч байж билээ. Ямар муухай нь авдаг байна аа гээд уур хүрдэг байв. Нэг шөнө Чингис Хаан зүүдээ манаж хоноод, зарим шийдвэрээ гаргадаг байсан гэдгийг сонсоод, зүүдэндээ тэр хулгайчийг харах юмсан гэж бодоод унтсан юм. Тэгтэл 11-р ангийн нэг эгчийг зүүдэлсэн л дээ, хөөрхий аваагүй байх өө, зүгээр л зүүд шд гэж бодоод өнгөрсөн дөө.

Валентиний баярын өмнө 100% төгс шоколад хайлуулах тухай

Үнэнээ л хэлье, би 20 гаруй наслахдаа 3 удаа л шоколад хайлуулж үзсэн. Эхлээд нэг Alpen Gold шоколад аваад, задлаад, тавган дээр тавиад, богино долгионы зуухандаа 3 минут хийчихсэн. 3 минутын дараа гаргаад иртэл нөгөө шоколаднаас маань бөөн элсэн чихэр бас хар нүүрс үлдсэн байсан юм. Дараагийн удаад нь арай туршлагажаад шоколадаа хайруулын тавганд хийж байгаад шарав аа. Бас л доод тал нь түлэгдэж наалдаад, хэвэнд ч орохооргүй өтгөн юм болж орхисон.
Харин сүүлийн удаад нь найзуудаасаа, интернетээс гээд мэдээлэл цуглуулж байгаад шоколад хайлуулах ажилдаа оров. Эхлээд том саванд ус буцалгана, тэгээд дотор нь арай жижигхэн сав хийнэ. Арай жижигхэн саваа бага зэрэг тослож болно, тослохгүй байсан ч болно л доо, ялгааг нь би олж хараагүй. Тэгээд хэр их шоколад хайлуулахаас хамаараад хар шоколад, сүүтэй шоколад хольж авах хэрэгтэй. Шоколадаа жижигхэн болгож хугалаад, бага багаар жижиг савандаа хийгээд хутгаж хайлуулна. Хэт өтгөн болоод байх шиг байвал жаахан сүү, эсвэл тос нэмж хийгээрэй. Хэтэрхий шингэлчихвэл бас шоколад чинь дараа нь барьцалдахгүй шүү!
Энэ бүх хайлуулах үйлдлийг хийж байх хооронд том савтай ус чинь байнга буцлалтын байдалд байх ёстой. Ингээд бүх шоколадаа хайлуулчихаад амталж үзнэ. Шоколад амтагдаж байвал зөв хийсэн байна гэсэн үг. Одоо харин хэвэндээ хийгээд хэдэн цаг сэрүүн газар байлгахад л 100% төгс шоколад бэлэн болно.

Мэдрэмжгүй залуучуудад зориулсан мэдрэмжтэй бэлэг сонгох зөвлөгөө

Өчигдөр гэртээ иртэл үүдэнд ягаан зүрхэн хээтэй цаасан хайрцаг, ширээн дээр шилэн хос хун байлаа. Юу вэ? 20 гарчихаад ийм бэлэг өгдөг залуу, авдаг бүсгүй байдаг гэж үү? 20 гарсан бүсгүйг найрах гэж хэн нэг залуу шилэн хос хунг сонгож аваад, баглаж боолгоод аваад иржээ. Ядаж тэрний оронд 3 ширхэг улаан сарнай цэвэрхэн боолгоод ирсэн бол арай дээр байх байсан даа гэж бодогдоод амжив. Тэгтэл 10 жилийн нэг явдал санаанд орж ирсэн юм. Монита болж бэлэг задлахад надад далавчаа дэлгэсэн, пластик бүргэд бэлэглэж билээ.
Хэд хоногийн өмнө найзуудтайгаа уулзаж байхад бас бэлэгний тухай яриа болов. Найз залуучууд нь хичнээн үнэтэй гоёл чимэглэл, хувцас хунар бэлэглэсэн ч нэг л санаанд нь таардаггүй, өмсөж чаддаггүй бас солиулж чаддаггүй гэж байсан. Тэгээд залуучууддаа хэрхэн гологдохооргүй бэлэг сонгох талаар хэдэн юм хэлж өгье. Хэтэрхий их кино үзээд, кино шиг амьдрал, аз жаргалтай төгсгөл, романтик зүйлс хүсээд байдаг гээд л эрчүүд нь биднийгээ их шүүмжилдэг. Гэтэл угаасаа эмэгтэй хүмүүс романтик юманд бүр анхнаасаа, кино гэдэг зүйл энэ дэлхий дээр байхгүй байхад дуртай байсан юм ш дээ.
За тэгэхээр, ямар нэг баяр болоод хэн нэг бүсгүйд сэтгэлээ илчлэх, найз охиндоо бэлэг өгөх боллоо гэж бодоё. Тэгвэл эхлээд шилэн, пластик, төмрөөр хийгдсэн хун, галуу, нугас, болжмор, бүргэд, хэрээ, өөр юу ч байдаг юм тиймэрхүү юмнаас татгалзах хэрэгтэй. Нэгд, тэр ер нь шал хэрэггүй бэлэг, хоёрт, тэгээд ч гэрийн засалтай тохирохгүй байх магадлал өндөртэй. Оронд нь миний хэлснээр цэцэг бэлэглэсэн нь хамаагүй дээр. Хэд хоног харж баясна, бас гэрийн засалтай тохирохгүй гэсэн юм ч байхгүй.
Хэрвээ гоёл чимэглэл, ээмэг зүүлт бэлэглэх гэж байгаа бол эхлээд тэр бүсгүйгийн хэрэглэдэг зүйлсийг харж санаа авбал зүгээр байх. Түүний гоёл чимэглэлтэй нь төстэй, гэхдээ өнгө хэлбэрийн хувьд арай өөр зүйлсийг сонговол түүнд таалагдах магадлал өндөр. Хэрвээ тэр том ээмэг зүүлтэнд дуртай бол адилхан томыг, жижиг ээмэг зүүлтэнд дуртай бол жижгийг авж өгсөн нь дээр. Би хүзүүний зүүлт хэрэглэдэггүй ч хүмүүс надад бэлэглэж байсан учраас тэд одоо гоёл чимэглэлийн хайрцганд минь орооцолдоод хэвтэж байгаа.
Хамгийн чухал нь хэзээ ч, хэзээ ч, хэзээ ч битгий хувцас авж өг. Зохихгүй, таалагдахгүй байх магадлал 99%!!! Манекенд өмсгөсөн хувцас гоё харагдаж байгаа ч эмэгтэй хүн бүрт өөрөөр зохиж болно. Бүр эмэгтэй найзууд нь эмэгтэй найздаа хувцас сонгож авахад хүртэл таалагдахгүй байх магадлал 98%. Дээрээс нь размер нь таарахгүй бол бүр эвгүй байдалд орно. Дахиад хэлье, хувцас бэлэглээд хэрэггүй. Мэдээж хамт дэлгүүр яваад, өмсөж үзээд `Энэ хувцасны энэ размер надад их зохиж байна шүү` гэж хэлсэн бол бас өөр л дөө. Гутал, ороолт, малгай ч бас эрсдэлтэй бэлгэнд орж байгаа юм.
За тэгээд, хямдхан, хуурамч үнэртэй ус, гоо сайхны бүтээгдэхүүний талаар дурсаад ч хэрэггүй биз. Залуу минь, оронд нь амттайхан шиг жижигхэн шоколад бэлэглэсэн нь дээр. Биед муу, арьсанд тохирохгүй, харшил өгөх магадлалтай гээд бодох юм бол гоо сайхны бүтээгдэхүүн ч бас дур мэдэж аваад бэлэглэхэд эвгүй л санагдаж байна шүү.
Тэгээд юу бэлэглэвэл таалагдах юм бэ гэж үү? Тэр бас хүн хүнээсээ шалтгаалаад өөрчлөгдөж болох ч ихэнх эмэгтэйчүүд романтик зүйлст ухаангүй дуртай байдаг юм шиг санагдсан. Хэзээ ч хуучрахгүй, бас `Ээ, арай ч дээ!` гэж бодогдуулахааргүй хэдэн санаа надад байна аа. Эхлээд, цэцэг бэлэглэх. Хэрвээ тэр бүсгүй чинь ургамлын эрхийн төлөө тэмцэгч биш л бол аятайхан баглаа цэцэг, за больё ганц улаан сарнай ч сэтгэлийг нь хөдөлгөж дөнгөнө. Тэгээд жаахан бүтээлч сэтгэвэл ваннаа халуун бүлээн усаар дүүргэж, сарнайн дэлбээ хөвүүлээд... Цаашаа өөрсдөө бодно биз.
Эсвэл, лааны гэрэлд гэртээ, гадуур сайхан дарс шимэнгээ, хооллох байж ч болно. Хоолонд дургүй хүн их ховор байх, тэгээд ч бид бүгд л өлсдөг нь үнэн ш дээ. `Хайр аа! Тэнд, тэдэн цагт хөөрхөн болоод ирээрэй` гэдэг мессеж хааяа ч гэсэн авж байх юмсан гэж нэг танил маань яриж байсан юм.
Миний бодлоор Бестселлер болсон номнуудаас аль нэгийг нь авж бэлэглэвэл бас гологдохооргүй бэлэг болох байх. Хэрвээ бүсгүйгээ гайгүй мэддэг бол уншдаг зохиолчдынх нь номноос бэлэглэвэл бүр гоё бэлэг болно. Кофенд дуртай бол кофений аяга ч юмуу, өөр ямар нэг хэрэгсэл, шоколаданд дуртай бол хааяа нэг чанартай шоколад бэлэглэж, дуртай амттанг нь аваад очвол тэгээд л эмэгтэй хүмүүс чинь уяраад л байна шүү дээ. Ер нь жижигхэн юман дээр сэтгэл хөдөлдөг хачин хүмүүс дээ.
Хэрвээ өөрөө баян бол бэлгийн санаанууд хязгааргүй. Дээрх бол зөвхөн хамгийн энгийн гэхдээ хамгийн найдвартай эмэгтэй хүний сэтгэлийг баясгах бэлэгнүүд юм. Жаахан сэтгээд, жаахан нэмээд, чимээд, хачирлаад өгвөл зааз тэгээд нөгөө бүсгүй ч уярсаан уярсан.

Зүүднээс Эхэлсэн - 2

Хэд хоногийн дараа, гэрээ цэвэрлэнгээ дуу дуулаад л, би их жаргалтай байлаа. Оройн хоолондоо хуушуур хийхээр төлөвлөв. Хаалга тогшоод байна уу даа? Хөгжмийнхөө дууг багасгавал яах аргагүй хэн нэг бүдүүлэг хүн чанга гэгч хаалгыг маань балбаж байна шүү.

-Хэн бэ?

-Бямбаа байна уу?

-Байхгүй ээ.

-Уулзах хэрэгтэй байна. Ороод хүлээж байя!

Оруулах уу? Байх уу? Хаалганыхаа түгжээг тайллаа. Насаараа надтай ойролцоо ч хамаагүй өндөр, даруухан хувцасласан залуу зогсож байна. Над руу муухай хараастай. Манай аав энэ хүүхдийн аавд өртэй байгаад өрөө өгөхөө мартсан юм байх даа?

-Аавтайгаа уулзах гэж ирлээ.

-Өө тэгвэл өөр Бямбаа байх. Чамайг танихгүй юм байна.

-Хөөе, охион! Чи яасан өөртэй итгэлтэй байх юм.

Зэвүүн үгтэй юм бэ?

-Би энэ айлын охин болохоор мэдэлгүй яах вэ!

-Чи ч гэнэнээрээ байх шив. Би чиний эцэг нэгтэй, эх өөртэй дүү чинь ш дээ!

Айн??? Юу болоод байна аа. Яг айл андуурсан байх. Эсвэл мэдрэл муутай.

-За тэнэгтээд байлгүй яв. Чи угаасаа айл андуурсан байна.

-Аав руу залгаад намайг ирсэн байна гээд хэл дээ.

...

Намайг утасдсанаас яг 17 минутын дараа аав ирлээ. Намайг өрөөндөө ор гэж загнаад тэр 2 хоорондоо их удаан ярилцаж суув. Хэрвээ тэр хүүхдийн хэлсэн үнэн бол? Би үнэн биш байгаасай л гэж залбирж байна. Ээж хурдан ирээсэй, бүхнийг мэдэх юмсан. Яагаад ч юм миний нулимс урсаад байсан учраас орондоо оръё гээж шийдэв. Гэтэл нам унтчихаж ээ. Хэн нэгний зөөлөн гар үсийг минь илэхэд би сэрлээ. Нүд минь уйлсаар байгаад хавдаж, зовхи нэг л хүнд болчихож.

-Охион, өнөөдөр их гайхав уу? Аав ээж 2 нь чамд хэлээгүй ийм юм нууж байсанд уучлаарай.

-Ээж, үнэн юм уу?

Хоолойд нэг их юм ирээд гацчихав.

-Үнэн.

Ээж муухан инээмсэглэлээ.

-Тэр хорт хавдартай хүн тэгвэл аавын? нөгөө... тэр хүүхдийн?

Яагаад ч юм ийм бодол толгойд орж ирээд, тэсэлгүй асуув.

-Ээж нь, аавын чинь...

-Та яаж мэддэг юм бэ? Хэзээнээс? Яаж? Надад бүгдийг нь яриад өг. Та бид 2 нэгнээсээ юм нуудаггүй шүү дээ.

-Ээж нь бүр анхнаас нь мэддэг байсан юм аа. Аав чинь орост төгсөж ирэхдээ л тэр хүүхэнтэй их дотно найзууд гээд байнга нийлдэг, хамт байр хөлсөлдөг байсан юм. Орост ч гэсэн нэг дотуур байранд, нэг өрөөнд хулгайгаар хамт амьдардаг байсан гэсэн.

Ээж чимээгүй болчихов.

-Тэгээд?

-Тэгээд аав ээж 2 нь танилцаж, үерхдэг болсон ч тэр хүүхэнтэйгээ хамт амьдарсаар л байсан. Би эхэндээ нэг их тоодоггүй байсан ч, сүүлдээ ганц нэг уурлаж, тусдаа амьдар гэж шаарддаг болсон. Харин тэгэх болгонд минь л бид 2 зүгээр л найзууд шүү дээ, битгий илүү юм бодож өөрийгөө зовоо гэдэг байсан юм. Би ч аавд чинь нэгэнт хайртай болсон учраас түүнд итгэдэг байлаа. Итгэдэг ч гэж дээ. Итгэж байна, итгэх ёстой гэж өөртөө байнга хэлдэг байсан. Инээдтэй нь, би жирэмсэн болчихоод аавын чинь хөлсний байранд нүүж очоод, нэг өрөөнд нь тэр, нөгөө өрөөнд нь бид 2 амьдардаг болсон. Ээж нь чамайг төрүүлэхдээ хүндрэл өгж, бие тэнхрэхгүй байсан болохоор аавынх руугаа явж 6 сар хиртэй болчихоод ирсэн юм. Харин эргээд иртэл нөгөө хүүхэн чинь цондгор гэдэстэй болсон байдаг байгаа.

-Нээрээ юу?

-Тийм ээ. Би ч нөхөртэй болчихож гэж л бодсон. Нөгөө хүнээ танилцуулаач гэхээр тэгнээ л гэдэг байсан юм. Гэтэл төрөх дөхчихөөд байхад эрэгтэй хүний бараа харагдахгүй болохоор нь би дотроо хөөрхий эцэггүй хүүхэд төрүүлж байна гээд их л өрөвддөг байлаа. Аав чинь бид 2т шөл хийж гүйгээд л. Би ч чадах ядахаараа их л тусалдаг байсан. Инээдтэй ч юм шиг, өрөвдөлтэй ч юм шиг.

-Би итгэж чадахгүй нээ. Аав үнэхээр тэгсэн гэж үү?

 -Амьдрал шүү дээ. Уул нь бол тэр хүүхэн аавтай чинь 10 жилдээ хэсэг үерхэж байгаад салсан, анхны хайраа өгсөн гэсэн. Бүр сүүлд өөрөө ярьсан юм. Гэтэл аав чинь тоогоогүй юм байх. Тэгээд л намайг эзгүйчлээд, жаахан халамцуу ирэхэд нь...

-Ээж, би таныг тэнэг гэх үү, юу гэх вэ? Та яаж ийм юмыг тэсдэг байсан юм бэ?

-Эхэндээ бүх юм утгагүй санагдах нь тодорхой шүү дээ. Би уурласаар байгаад өөр байр луу нүүсэн. Байнга л уйлдаг байлаа. Аав чинь хөөрхий буруу юм хийсэн болохоор их ч тэвчсэн дээ. Тэр хүүхэнд л бүх буруугаа өгнө.

-Та хэзээ мэдсэн юм бэ?

-Тэр овоо тэвчээртэй хүүхэн байсан шүү. Хүүгээ ганцаараа 4 нас хүртэл нь үг дуугүй л өсгөсөн. Харин 4 хүрэх үед нь өөрийгөө тархины хорт хавдарын анхан шатанд явж байгаагаа мэдсэн юм. Нэг орой л хүүгээ дагуулж ирээд хамаг юмаа ярьсан. Тэгэхэд хүн юу ч хийж чаддаггүй юм билээ. Дээрээс хүв хүйтэн ус асгачихсан юм шиг. Би ч маргааш өглөө нь чамайг аваад аавынх руугаа явсан даа. Аав чинь араас ирж алдаа байсан, уучлаач гээд уйлж гуйсан. Тэгэхэд нь би энэ хүн надад үнэхээр хайртай юм байна гэж бодсон доо. Гэхдээ л бидний харьцаа нэг л өөр болчихсон. Угаасаа яаж ч олигтой байх вэ дээ.

-Одоо тэгээд яадаг юм?

-Одоо нэг их удаан амьдрахгүй хүнийг яалтай вэ. Анх бол үзэн яддаг байлаа. Харин одоо бол өрөвддөг юм аа. Аав чинь ч тэгдэг байх. За за, баахан дэмий юм ярьчих вуу даа? Гэхдээ хэлэх цаг нь болсон юм шиг байна.

-Угаасаа миний мэдэх цаг ч болж.

-За охион, сайхан амар даа.

Духан дээр үнсэв. Гуниг үнэртэх шиг. Шөнөжингөө энд тэнд нялх хүүхэд уйлж байна гэж зүүдэллээ.